Perlur hafsins - Upp til fjalla

Matseðill MA-hátíðarinnar að kvöldi 16. júní hefur borist frá Bautanum. Boðið verður upp á Perlur hafsins í forrétt, aðalréttinn kalla Bautamenn Upp til fjalla og í eftirrétt verður Tiramisu terta, sem er ítölsk ostaterta, sérlega ljúffeng, ef minnið svíkur mig ekki. 

Nánar um matseðilinn í hátíðardagskránni hér til hliðar - smellið á HÁTÍÐIN Í HÖLLINNI efst vinstra megin.

Miðasala hafin á heimasíðu Bautans

Miðasala á MA hátíðina í Íþróttahöllinni að kvöldi 16. júní er hafin á heimasíðu veitingahússins Bautans, www.bautinn.muna.is þar sem gefið er upp nafn, kennitala, hvaða afmælisárgangi viðkomandi tilheyrir og fjöldi miða sem sá vill kaupa.

Fleiri myndir

Var að bæta slatta af myndum í Albúmið "Við þá" - úr útskriftarferðinni til Krítar, frá Dimmisso og undirbúningi busavígslunnar haustið 1981. Hér er eitt sýnishorn; Sossa og Lalli - Soffía Ófeigsdóttir og Lárus Blöndal - í veislu á Krít. Ég trúi því varla, en sé þó ekki betur en þau séu þarna með hákarlsbita á göfflunum. Er líklega farinn að sjá illa.

Tekið skal fram enn er um að ræða gripi úr fjársjóði Írisar Ingvarsdóttur. Lýsi hér með eftir fleiri myndum annars staðar frá.

25 dagar

Mér reiknast svo til að nú séu 25 dagar þar til 16. júní rennur upp bjartur og fagur. Dagskrá MA-hátíðarinnar í Höllinni er að mestu tilbúin og verður birt hér á síðunni í dag - efst vinstra megin undir því frumlega heiti DAGSKRÁIN 16. JÚNÍ, þar sem allar upplýsingar um matseðil, skemmtiatriði, verð og slíkt eiga að koma fram. - Með baráttu- og tilhökkunarkveðjum, Skapti.

34 dagar

Nú eru 34 dagar þar til 14. júní rennur upp. Vonandi bjartur og fagur.

Ég sé fyrir mér vinskap. Kannski líka vínskáp.

Ógleymanlegur fróðleikur

Margir einstaklega áhugaverðir fyrirlestrar voru í boði á Krít haustið 81 og fróðleiksþyrstir MA-ingar hlýddu jafnan á með aðdáunarverðri athygli. Þarna er verið að lýsa þróun gróðurfars eyjarinnar frá öndverðu og hrein unun að sjá gleðina og áhugann sem skín úr augum hinna íslensku gesta. Hermt er að Erlingur Jóhannsson muni endursegja fyrirlesturinn að kvöldi 14., 15. og 16. júní næstkomandi. Honum til aðstoðar verður Torfi Fjalar Jónasson.

Reynt var að fá leiðsögumanninn sem heiðursgest í óvissuferðina 15. júní en í ljós kom að konan er öll. Ólöf Jónsdóttir drap hana með augnaráðinu, fáeinum andartökum eftir að myndin var tekin.

Úr skúbbmyndasafni Írisar Ingvarsdóttur.

Höfuðföt

Sólin var svo heit á Krít um árið að sumir þurftu þrjá hatta til þess að skýla á sér hausnum, meira að segja inni í rútunni. Ég man ekki í svipinn hvaðan Larri er en Ólöf er úr Goðabyggðinni og greinilega ýmsu vön, enda alltaf sól þar.

Úr skúbbmyndasafni Írisar Ingvarsdóttur.

Fjör í den

Mér sýnist á svip Finnboga forstjóra að hann hafi í þessu partíi 1982  séð fyrir lækkun kílóverðs á ufsa mörgum árum síðar og sé ekki skemmt. Eða kannski er honum einmitt skemmt. Stelpunum virðist standa á sama.

Úr skúbbmyndasafni Írisvar Ingvarsdóttur.

Krúttleg

Þau hafa ekki mikið breyst, Dídí og Kiddi. Þessi er úr myndasafni Írisar Ingvars, sem áður hefur verið getið á þessum vettvangi en sannast nú loks að er til. Myndin er tekin þegar fólk var puntað fyrir Dimmissio. Sennilega Sveina lengst til hægri, reyndar næst lengst til hægri, sú sem nær upp fyrir myndina...

Að kaupa miða

Nú er í vinnslu sérstakt Bautasíðugerðarmannamiðapöntunarkerfi - sem sagt, á heimasíðu Bautans - www.bautinn.is - verður komið upp idiotproof sýstemi til þess að skrá sig í veisluna 16. júní og kaupa miða. Er það gert til hagræðingar fyrir þá sem standa að veislunni og til þess að létta undir með þeim sem koma að málum síðar meir.

Vonandi er ég ekki að ljúga neinu. Þetta á að komast í gagnið fljótlega.